Solidaridá.

Los y les trabayadores d'Aguas de Langreo y de los Talleres Jesús Álvarez tan esta selmana lluchando pol so futuru y pola so dignidá. Estes empreses de Llangréu tan nuna mala situación y los sos dirixentes son los másimos responsables d'ello pero como siempre los trabayadores paguen les consecuencies.

N'Aguas de Langreo tan lluchando por que quieren otru modelu d'empresa y otra xestión. Quedaron ensín paga de navidá decenes de families humildes mentantu los responsables de la situación económica d'esta empresa mixta viven perbien. Depués de munchos atropellos decidieron entamar la llucha y esta selmana cellebraron una xornada de fuelga y una concentración reivindicativa énte la Casa Conceyu.

Per otru llau la situación nos Talleres Jesús Álvarez, asitiaos en Valnalón, ye ainda pior. Plantegose un ERE que quier faer un despíu masivu, una riestra de suspensiones de contratos pa 2 años y qu'amenorga la xornada llaboral ( y el salariu) de 3 persones d'alministración. Qu'esti ERE salga alantre supondría práuticamente el desaniciu d'esta empresa. Tan faciendo yá paros parciales y van siguir mañana 20, el 21 y el 26 d'avientu ente les 13:00 y les 15:00 hores.

Ciertamente, estes dos situaciones yá pasaron munches vegaes nel Conceyu de Llangréu colos mesmos nomes d'empreses o con otros, nun importa. El casu ye que l'esmantelamientu del texíu industrial y llaboral d'esti conceyu avanza pasu a pasu y la precariedá paez que se quier normalizar como modo de trabayu común.

La llucha n'Aguas de Langreo y los Talleres Jesús Álvarez lo qu'amuesa ye que estos conflictos espeyen la situación permala que vive Llangréu y la clas trabayadora. Dende Conceyu Abiertu por Llangréu llamamos a toles persones del conceyu a tratar d'amosar la so solidaridá colos trabayadores afeutaos. Güei son ellos y elles, pero mañana puedes ser tú mesmu. Nun se trata de seutores productivos, hemos de romper con esa idea, son trabayadores y vecinos, como tú, que viven la mesma situación d'agresión capitalista ya imposiciones antisociales que tol Pueblu Trabayador ta sufriendo. SOLIDARIDÁ.