Mieres protestó pola situación d'EMTUSA, y en sofitu a los mineros enzarraos nel Ayuntamientu

 

 

Esti martes Mieres protestó en defensa d'EMTUSA, y en solidaridá colos mineros depidíos por subcontrates y enzarraos nel Ayuntamientu.

La mañana d'esti martes tuvo marcada en Mieres pola concentración vecinal desendolcada frente al Ayuntamientu. L'envís yera amosar el sofitu pa colos trabayadores d'EMTUSA, y puxar pola so continuidá. EMTUSA ye la empresa municipal de tresporte urbano, que ta acabante de sufrir un importante retayu nos sos servicios debío a la situación económica na que s'atopa. Dende la Conceyalía de Tresportes llegaron a afirmar que, si nun hai novedá, en tres meses EMTUSA entrará en Concursu d'Acreedores, polo que nun descarten llegar a la privatización del serviciu.
D'otru lláu, nel mesmu Ayuntamientu, un grupu de seyes mineros despidíos por subcontrates d'HUNOSA atópense enzarraos en protesta pola so situación particular, y tamién pol futuru del seutor mineru. Anque'l coleutivu en protesta ye'l mesmu que s'enzarró en Samartín, los integrantes de l'aición son persones distintes, pero coles mesmes vindicaciones: atopar trabayu n'HUNOSA como escedentes de la minería, y cobrar los salarios adeudaos poles subcontrates pa les que trabayaron. Nesi sen, de magar les 18:00 hebo una concentración d'apoyu a estos mineros, críticos cola poca implicación de CC.OO y SOMA. Pol contrariu, destaquen el sofitu de sindicatos como USO o CSI, presentes nes sos protestes.

fonte: www.infoasturies.net